దీపావళి పండుగ వేళ.. మొరాయించిన ఐఆర్‌సీటీసీ వెబ్‌సైట్.. టికెట్ల బుకింగ్‌కు ప్రయాణికుల తంటాలు

దేశవ్యాప్తంగా రైలు టికెట్లను ఆన్‌లైన్‌లో బుక్ చేసుకునే ప్రయాణికులు శుక్రవారం తీవ్ర అసౌకర్యానికి గురయ్యారు. భారతీయ రైల్వే క్యాటరింగ్, పర్యాటక సంస్థ (ఐఆర్‌సీటీసీ)కు చెందిన వెబ్‌సైట్, మొబైల్ యాప్ సేవలు కొన్ని గంటల పాటు పూర్తిగా నిలిచిపోయాయి. దీంతో వేలాది మంది ప్రయాణికులు టికెట్లు బుక్ చేసుకోలేక ఇబ్బందులు పడ్డారు.

వివరాల్లోకి వెళితే, శుక్రవారం ఉదయం నుంచి ఐఆర్‌సీటీసీ వెబ్‌సైట్, యాప్ రెండూ అందుబాటులో లేకుండా పోయాయి. ఆన్‌లైన్ ద్వారా టికెట్లు బుక్ చేసుకునేందుకు ప్రయత్నించిన వారికి నిరాశే ఎదురైంది. దేశవ్యాప్తంగా ఒకేసారి ఈ సమస్య తలెత్తడంతో, అత్యవసర ప్రయాణాలకు సిద్ధమైన వారు తీవ్ర ఆందోళనకు గురయ్యారు.

ఐఆర్‌సీటీసీ సేవల్లో అంతరాయానికి సాంకేతిక సమస్యలే కారణమని తెలిసింది. ఈ లోపాన్ని గుర్తించిన వెంటనే సాంకేతిక నిపుణుల బృందాలు రంగంలోకి దిగాయని, సేవలను వీలైనంత త్వరగా పునరుద్ధరించేందుకు చర్యలు చేపడుతున్నాయని సమాచారం. కొన్ని గంటల తర్వాత సేవలు తిరిగి సాధారణ స్థితికి వచ్చాయి.